Egitasmoan parte hartuko duten ikasleak ikastetxeek eurek aukeratzen dituzte interesa dutenen artean, izan ere, ezagutza gustuko duten 4. DBHko ikasle "motibatuei" zuzendutako hitzaldi sorta da Jakin-mina, azken batean.
Goi-mailako hizlariak
Donostian bost hitzaldiko bi ziklo eskainiko dira eta ikasleek ziklo bat aukeratu eta ziklo horretako bost hitzaldietara joateko konpromisoa hartu behar dute. Ikerbasqueko Hubie Chen, Thomas Schäfer eta Arantzazu Gartzia-Lekue ikertzaileak; Mariasun Landa idazlea; EHUko Miren Azkarate, Juan J. Iruin, Jasone Cenoz eta Emilio Perez Trallero katedradunak; Donostia Ospitaleko Itxaso Martí neuropediatra; eta adimen artifizialean aditu Elena Lazkano arituko dira.
Hirugarren edizio honetako hitzaldi zikloak azaroaren 22an eta 29an hasiko dira, hurrenez hurren, eta martxoan amaituko da egitasmoa. Aurreko edizioek arrakasta handia izan dute ikasleen artean.
Laguntzaileak
Jakin-minak Eusko Jaurlaritzaren Hezkuntza, Hizkuntza Politika eta Kultura Sailaren babesa eta EHUko Kultura Zientifikoaren Katedraren laguntza du EAEn; Nafarroan, berriz, Nafarroako Gobernuko Euskararen Irakaskuntzarako Baliabide Zentroarena (EIBZ).