Rosariok bere ahotsa eta estiloa goraipatu zituen: "Berezia zara. Ez birritan pentsatu, zatoz nirekin! Zure esanetara naukazu", esan zion. Orozcok esan zion "interpretazio bikaina" egin zuela eta "ahotsa oso afinatua" izan zuela. Maluk ere loreak bota zizkion: "Ikusi nuen besteek bira ematen zutela eta erlaxatu egin nintzen".
Amak eta izebak irrintzi batekin eta besarkadekin zoriondu zuten Idoia.
Euskal Telebistan finalista
"Txikitatik artista bat da, eta familian ere musikari asko izan ditugu", esan digu Marije Elortzak. Tabernetan, antzokitan… abestu izan du Idoiak, eta Euskal Telebistako Kantuan saioko finalera ailegatu zen. La Voz-en aukeraketa bakarra ikusi dugu telebistan, baina aurretik "aukeraketa piloa" pasa behar izan ditu Idoiak.
Orain etxean dago, eta saiotik deitzen diotenean joan behar izaten du; adibidez, estilismo-probak egitera. La Voz-en bigarren fasean, Las batallas delakoan agertuko da berriz telebistan Idoia.
Marijek dio gustura joango litzatekeela berriz ilobari lagun egitera. Telecincon "oso-oso ondo" tratatu zituztela diosku: "Oso ondo portatu ziren. Jesus Vazquezekin oso ondo moldatu ginen eta baita Tania Llasera bizkaitarrarekin ere".