Artatse elkartea erantzule zibil bezala Entzutegi Nazionalera deitzen duen zitazioa esku artean eta laranja kolorez jantzita, urriaren 17an hasiko den 'Herriko tabernen' auzia izenez ezagutzen den 35/02 epaiketa salatu dute. HBko, Batasunako eta EHko 37 lagun epaituko dituzte sumario horren barruan, baita 110 herriko taberna eta elkarte ere. Hala, Artatse, beste hainbat herriko taberna eta elkarterekin batera ateak itxi arazteko arriskuan dago.
Agerraldian salatu dute, bake eta konponbiderako bidean oztopo larria direla udazkenean hasiko dituzten makroepaiketak, tartean, 35/02 sumarioarena. Eta, gogoan izan dituzte euskal herritik urrun dauden euskal herritarrak; bereziki gogoan Jose Luis Elkoro bergararra. Gogoratu, Elkoro ez dutela herriko tabernen auzian epaituko.
Asteburuan ospatuko diren San Martin jaietan ekimenak egingo dituzte makroepaiketa salatzeko; esaterako, herritarrei dei egin diete kalera laranja kolorez jantzita ateratzeko. Zapi eta kamiseta laranjak Arrano tabernan egongo dira salgai baina laranja den edozerk balioko du ekimenarekin bat egiteko. Horrekin batera, epaiketaren kostuei aurre egiteko txozna ipiniko dute eta bonoak ere salduko dituzte.