Danborradako entseguekin, hasi dira San Martin jaietarako motorrak berotzen

Atzo, astelehena, izan zuten danborradako lehen entsegua eta gaur, martitzena, eta bihar, eguaztena, ere egingo dituzte. Baita datorren asteko astelehen, martitzen eta eguaztenean ere. Ohi den moduan, nagusien danborrada hilaren 15ean izango da, domeka, eta umeena, hilaren 16an, astelehena. Aurten haurren danborradan 250 umetik gora espero dituzte eta nagusienean beste horrenbeste. Oraindik danborradan parte hartu nahi dutenek, izena eman dezakete kultura etxean.

Entseguak umeek arratsaldeko 19:00etatik 20:00etara eta helduek 20:00etatik 21:00etara izango dituzte Aranzadi Ikastolaren gimnasioan, lehengo Haurtxoa haurtzaindegian.

Gaztetxoak pozik

Atzo egin zuten lehenengo entsegu horretara pozik joan ziren gaztetxoak. Izan ere, kontatu ziguten asko gustatzen zaiela danborra jotzea eta gaztetxo askorendako gainera, aurtengoa ez da danborradan parte hartzen duten lehenengo aldia izango.

Izena eman daiteke oraindik

Peio Garitano da haurren danborradako arduraduna eta bere esanetan, aurten ere haurren danborradan 250 umetik gorak hartuko dute parte eta nagusienean ere 250 lagun inguru espero dituzte. Jende berria ere apuntatzen ari dela azaldu du Garitanok.

Oraindik danborradan parte hartzeko izena eman ez duten herritarrek, gainera, aukera izango dute kultura etxean izena emateko eta datozen egunotan egingo diren entseguetara joateko.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.