Nazioarteko zine berritzailearen erakusleiho ikaragarria izateaz gain, Zinemaldia, Euskal Herrian egiten diren lanen bozgorailua ere bada, horregatik sortu zen Zinemira atala. Aurten, euskal produkzioak mimatzen diren sail honetan, zortzi film ikusiko dira, tartean Amaren eskuak.
Gabilondok oso istorio kuttuna eta hurbilekoa sortu du. Ama eta alaba baten arteko harremanean murgilduko da ikuslea. Errua, maitasuna, ezberdintasunak, eta guztiaren gainetik, bi emakume hauen arteko parekotasunak azalean geratu dira.
Bergararraren filma, beste sei luzemetraiekin batera, euskal zinemaren Irizar Saria eskuratzeko lehiatuko da. Irizar saria nori eman epaimahai espezifiko batek erabakiko du, eta saridunak 20.000 euro gordin irabaziko ditu, filmaren ekoizleentzat.
Hau baina, ez da Debagoienak Zinemaldian izango duen presentzia bakarra. Asier Altunak ere bere azken film laburra: 'Zela trovke' ('Belarra mozten'), Zabaltegi sailean erakutsiko du-eta.