Biktimaren eta hainbat lekukoren deklarazioaren arabera, domekan, 04:20ak inguruan gizonezko bat tabernara gerturatu, eta itxita egon arren, jabea eta bezero bat barruan zeudela ikustean, atea kolpatzen hasi zen. Jabeak adierazi zion taberna itxita zegoela, baina gizonezkoak kolpeka segitu zuen, kristalera txikitu arte.
Polizia aurrekariak
Segurtasun Sailaren arabera, tabernara sartu zen gero, eta edalontzi batzuk jaurti zizkion jabeari, bekokian eta besoetan zauriak eraginez. Osasun zentrora joan behar izan zuen emakumeak zauriengatik, baina lehenago gertatutakoaren berri eman zion poliziari, eta haiek ondoko kale batean atzeman eta atxilotu zuten gizonezkoa, lesioak eta kalteak eragitearen akusaziopean.
Segurtasun Sailak emandako informazioaren arabera, atxilotutako gizonezkoak 44 urte ditu eta aurrekari polizial ugari. Epailearen aurretik pasako da datozen orduotan.