Eguenean hasi ziren Basalgoko Santiago festak eta gaur emango diote amaiera jaiari. Haurrak eta erretiratuak izango dira protagonista. 12:30ean meza egin dute, eta luncha prestatuko dute jai batzordeko kideek osterako. Eta mokaduaz gain, umeentzat jolasak egon dira.
Herri bazkaririk ere ez da falta izango Basalgon; 14:30ean hasita, auzoko erretiratuek eta jai batzordeko kideek bazkaria egingo dute.
Santa Anak, domekara arte
Boluan, Arruriagan eta Burdinaten Santa Ana jaiak ospatuko dituzte gaurtik domekara. 20:00etan izango dira txupinazoa eta Santanatxoren jaitsiera. Sardinak jateko aukera egongo da (21:00) eta Still eta DJ Pinok girotuko dute gaua (22:30).
Zapaturako egitarau polita antolatu dute: pintura eta marrazki lehiaketa (10:00), umeentzako jokoak (12:00), mozorro lehiaketa (18:00), Bolua otxotea (19:30), eta herri afaria (21:30) izango dituzte, besteak beste.
Domekan, festen garra itzali aurretik, zer egin izango dute auzora bertaratzen direnek. Pilota partiduak ikusteko aukera egongo da (11:00), baita Goenkaleko klaratarren elizan meza entzun ostean salda eta txorizoa jateko aukera ere (12:30). Arratsaldean, 16:30ean hasita, puzgarriak eta Avenida Orkestraren emanaldia. Santanatxoren igoeraz amaituko dira jaiak.