Duela hilabete zabaldu zituzten Bergarako kanpoko igerilekuak eta iaz baino jende gehiago ibili da aurten; guztira, 40.000 lagun sartu dira hilabetean. Egunez eguneko datuak hartuz gero, bataz beste, joan zen urtean baino 150 lagun gehiago ibili dira aurten egunero, eta gutxi gora behera, 1.300 pertsonak erabili dituzte egunero kanpoko igerilekuak azken hilabetean. Unai Asurmendi Agorrosin ekintza guneko gerenteak dio arrakasta dutela igerilekuek eta udalekuetako mugimendu handia ere izan dutela aurten.
Egoki erabiltzearen garrantzia
Erabilera aldetik, baina, erabilera egokiagoak egiteko eskaera egin die erabiltzaileei Asurmendik. Izan ere, belarretan zakarrak aurkitzen dituzte eta ur kontsumoa ere handitu egin zaie umeak dutxetan jolasean ibiltzen direlako.
Tabernako terraza bitan banatuta
Tabernari dagokionez, aurten terraza bi zatitan banatu dute. Modu horretara, kanpoko eremutik ezin da taberna barrura sartu, eta kaletik tabernara joaten direnak, ezin dira igerilekura jaitsi. Horren harira, Asurmendik azaldu du, kexaren batzuk jaso dituztela batez ere taberna barruraino sartu nahi zuten batzuengandik, baina orokorrean aldaketa positiboa dela esan du.
Hamakendako gunea
Bestetik, hamakak uzteko gunea ere badute Bergarako igerilekuetan. Horrela, jendeak hamakak etxetik igerilekura eraman ditzake, eta gero hamaka berriro etxera eraman beharrean, gune batean hamakak beste egun baterako uzteko aukera daukate. Zerbitzu horrek arrakasta handia duela adierazi digu Asurmendik.
Datorren ikasturterako kirol jarduerak
Bestalde, dagoeneko datorren ikasturtearekin pentsatzen ari direnendako, Agorrosinen zabaldu dute datorren ikasturteko kirol jardueretako zozketan izena emateko epea; 2.200 plaza eskaintzen dituzte 21 kirol jardueretarako. Informazio gehiago Agorrosin.net webgunean eta Agorrosingo harreran bertan jaso ahal izango duzue.