Aitonetako lorategia egokitzen ari dira. Sarreraren eskuma aldean dagoen lorategi zatia ari dira egokitzen, probetxu handiagoa ateratzeko asmoz. San Joxepe elkarteak egindako eskariari erantzunez ari da Udaleko brigada gunea txukuntzen. "Oso gutxi erabiltzen zen", esan du Iñaki Zabala elkarteko lehendakariak; "sustraiak kanporaino zituen gerezizondo zahar bat zegoen, edozein erori eta min hartzeko moduan, mahai zahar bat... Uda partean, bereziki, erabilpen handiago eman nahi genion lorategi zati horri".
Udal brigadako langileak ari dira lanok egiten. Apurka-apurka dihardute, herriko beste gune batzuetan egiten ari diren lanekin txandakatuz. Hala eta guztiz ere, asteon lanak bukatuko dituztela aurreratu dute Udal brigadatik.
Zuhaitz berria jarriko dute
Erabat hustu dute lorategia eta belarraren ordez hormigoizko zorua jarri dute. Lokatza sortzea ekidin nahi dute eta inork irrist egin eta erortzea. Dagoeneko amaituta dago lan hori. Horrekin batera, lorategia inguratzen duen heskaia txukundu egingo dute Udaleko lorezainek eta negu partera zuhaitz berria ere landatuko dutela aurreratu du Udaleko lorezainen buruak.
Horren harira, gehitu du oraindik ze motakoa izango den erabakitzeke dagoen arren, "gerizpea emango duen zuhaitza" izango dela.
Lekua egokitzeko lanak amaitu ostean, tabernako arduradunek mahaiak, aulkiak eta eguzkitakoak jartzeko asmoa dutela ere aurreratu dute.