San Pedro, parrokiako zaindariaren eguna izanda meza nagusia egon da goizean eta berezia izan da bi arrazoirengatik: batetik, bi urtetako zaharberritze lanen ostean, herritarrek meza bertan entzuteko aukera izan dutelako berriz; eta bestetik, koro parrokialaren estreinaldia izan delako.
Jon Molina parrokoak gidatu du meza eta ondoan izan du, besteak beste, Bergaran abade izanagatik aski ezaguna den Juan Kruz Mendizabal, gaur egun Donostiako Gotzaindegiko Bikario Nagusia.
Ordu eta erdiz luzatu den mezaren amaieran, esker hitzak izan ditu Molinak parrokiaren zaharberritzeaz arduratu den ekipo teknikoarendako, eta bereziki, inaugurazio aurreko egunetan buru belarri lanean aritu diren herritarrendako.
Molinari berari ere eman dizkiote eskerrak kristau komunitatearen izenean, egindako lan guztiagatik.
Koro parrokialaren estreinaldia
Estreinaldi ederra egin du koro parrokial eraberrituak. 60 bat gizon-emakumek osatzen dute, Rosa Narbaizaren zuzendaritzapean, eta parrokia erabat bete duten herritarrek gustura entzun dituzte euren doinuak. Besteak beste, Perosiren Lehen Meza Pontifizila abestu dute, eta baita Hilarion Eslavaren Tues Petrus-a ere.
Mezaren amaieran lunch txikia ere eman dute herritar guztiendako portikoan.