Garaipen batekin egin du debuta Beñat Rezustak profesional mailan (22-17)

Egun handia izan da gaurkoa Bergarako pilotarendako. Beñat Rezusta pilotariak nekez ahaztuko du gaur bizi izan duena: profesionaletan debuta, San Juan egunean eta, non eta esku pilotaren katedrala den Eibarko Astelena pilotalekuan. Osagai horiek guztiak borobiltzeko, Aritz Lasa aurrelariaren laguntzarekin, 22-17 menderatu dituzte Peñagarikano eta Jaka. Bergarako hainbat lagun izan ditu ondoan atzelari bergararrak; lehia amaieran aitortu digu asko laguntzen duela halako egun baten lagunak ondoan izatea: "Astean zehar kamisetak eta pankartak egiten aritu dira. Asko eskertzen da keinua; halako lagunekin partidu onak egiten ahalegindu behar".

Atzelari bergararrak urduri hasi du lehia baina berehala hartu dio neurria maila berriari. Ondoan izan duen bikotekideak asko lagundu dio: "Partidu hasieratik aritu da pilota bakoitzera nola sartu aholkatzen. Pilota txar asko kendu dizkit eta horrela askoz erosoago jokatzen da".

Reyes Azkoitia ere, "oso pozik"

Hainbat urtez Rezustaren entrenatzailea izan den Reyes Azkoitiarekin ere egon gara partidu amaieran: "Egun handia eta polita da Beñatentzat, niretzat eta Bergarako pilota taldearentzat. Emaitzak lagundu egin du, gainera". Hasieran urduri egon dela uste du Azkoitiak baina "ulertzekoa" ei da: "Ni neu ez naiz sekula horren urduri egon. Urduri hasi dela esango nuke baina gero presioa ondo eramaten jakin du".

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.