Ekainaren 17an izan zuen epaiketa Parisen Bixkai-k, eta han ebatzi zuen epaileak Frantziarekiko zigorra beteta duela dagoeneko. 20 bat egunen barruan burutuko dute estradizioa Espainiara, eta Audientzia Nazionalaren esku geldituko da, Bergarako Herrirak adierazi duenez. Instantzia horrek behin-behineko espetxealdia aginduko du, epaiketa izan arte, eta epaiketa horretan jakingo da zein den Espainiako justiziak ezartzen dion zigorra, Bergarako Herrirak zehaztu duenaren arabera.
Konponbidearen bidea
17 lagun joan ziren Parisera epaiketa ikusi eta Bixkai-ri babesa eta elkartasuna adieraztea. Izan zuten bera agurtzeko eta berarekin hitz egiteko aukera ere. Lau ordu iraun zuen epaiketak eta bukaeran hitza hartu zuen preso bergararrak. Frantziako gobernuari zuzendu zitzaion hango espetxe politika salatzeko eta konponbidearen bidean lana egiteko eskatzeko. Ezker abertzaleak hartu duen bidearekin bat egiten duela ere adierazi zuen Bixkai-k.