Orain hilabete batzuk martxan jarritako proiektua da Bat-batean. Aurrez grabatutako soinuei, Oskar Estangak gehitzen dizkion gitarra hotsei bat bateko bertsoak gehitzen zaizkie. Beraz, bertsoak bere horretan izan beharrean musikatuak izango dira, besteak beste reggae, samba, sona eta tango soinuak entzuteko aukera izango dute bertaratutakoek, baina bertsoz jantziak.
Estangarekin batera Jon Martin arituko da bertsoak botatzen. Ikuskizun desberdina da eta Estangaren esanetan, apustu pertsonal bat ere bada ikuskizun hau, gai jartzailerik ez da egongo eta inprobizazioarenzako tartetxoa ere egongo da. Hala, bertsozale petoak ez diren horientzako ere erakargarria den saioa dela esan daiteke. Hala, zerbait desberdinaz disfrutatu nahi dutenek aukera bikaina dute.