Batzokiko asteburuko pintadak gaitzetsi ditu Bergarako EAJk

Jon Berezibar 2013ko eka. 17a, 20:00

Egubakoitz gauean Batzokian egindako pintadak gaitzetsi ditu Bergarako EAJk, bide politiko eta demokratikoaren aurkakoak direla iritzita, eta udal gobernuari ere gauza bera egiteko eskatu diote jeltzaleek. Egileei ere deia egin diete jeltzaleek: "margo eta plantiletan erabiltzen duten aurrekontu eta energia", "bakearen eta normalizazio politikoaren alde" erabili ditzatela.

Zapatu goizaldean Bergarako Batzokiko hormetan agertutako pintaden harira, salaketa egin gura du EAJ Bergarako Buru Batzarrak. Hedabideetara zabaldutako ohar baten bitartez, Bergarako jeltzaleek diote ez direla "bateragarriak esklusiboki bide politiko eta demokratikoak erabiltzeko apustua eta alderdien egoitzei egiten zaizkien erasoak". Gertatutakoa irmoki gaitzestearekin batera, Bergarako EAJk deia egin die pintanden egileei ere, "margo eta plantiletan erabiltzen duten aurrekontu eta energia", "bakearen eta normalizazio politikoaren alde" erabil ditzaten. Bergarako udal gobernua ere aipatzen dute oharrean, gertatutakoa gaitzets dezatela eskatzeko.