Udaberriko erakustaldia egin zuten zapatuan Bergarako Musika Eskolako txiki, nagusi eta irakasleek. 400 partaide baino gehiago izan zituen zapatukoak biolin, txistu, akordeoi jotzaileekin ala orkestrako kide diren nagusiagoekin, guztira. Kontzertua gainera, frontoian izan bazen ere, lehenago kalejira egin zuten kaleetatik trikiti taldekoek eta kontzertua eta gero, afaria egin zuten; arratsalde-iluntze osorako plana, hortaz.
Zapatukoa 25. Udaberriko Kontzertua izan zen eta urtean zehar egin ohi dituzten halako kontzertuen errepertorioa izan zuen azken horrek ere. Hala, txikienek ikasitakoaren erakustalditxoa egin zuten, gurasoen gozamenerako, eta nagusiagoek pieza klasiko eta herrikoiak tartekatu zituzten, keinu dibertigarri bat edo besterekin arratsaldeari umore ukitua emateko.
Ongi-etorria abesbatzakoek egin zieten ikusleei, harmailetan bertan ongi-etorria abestuta. Sara Manzano eta Irene Hernando arduratu ziren saioa gidatzeaz eta, taldeka, eskolaren sail ezberdinetako neska-mutikoak atera ziren: Suzuki taldeko biolin-jotzaileak, akordeoi orkestra Eibarko taldearen laguntzarekin, hasiberrien abesbatza, txistu taldea, trikitia, orkestra sinfonikoa... Eskolako ohiko zuzendariek gidatuta, trebetasun berdinarekin jo zuten Strauss-en bat ala The Police-eren Every breath you take ezaguna. Kontzertua, ezin beste, Musika Eskolako martxarekin amaitu zuen abesbatzak, txalo zaparrada jasota.