Beñat Rezusta profesionaletara Asperen eskutik

"Debuta egitea jada sari galanta izango da", adierazi dio Goienari Beñat Rezusta atzelari bergararrak, dagoeneko Aspeko pilotari profesional moduan. Badirudi Aspeko begiraleek begiz jota dutela Debagoiena, enpresa eibartarrak plantilla berritzerako orduan gureko pilotariak aukeratu dituelako – harritzekoa ere ez da, Jokin Etxaniz kirol zuzendaria etxekoa izanda. Oraingoan Rezusta (Bergara, 20 urte) gaztea aukeratu dute profesionaletara salto egiteko, ondo merezitako aukera.

Besteak beste 22 urtez azpikoetan Munduko Txapeldun izan delako, eta baita DV Sariko txapeldun ere, 2010ean. Gertuago, Jaka pilotariarekin bikotea osatuta Bergara Hiria torneoa irabazi berri du, maiatzean. Eta, finalean Xabier Tolosaren kontra egin zuen partidu ona lagungarri izan zen Aspeko ateak zabaltzeko. Hain zuzen, Rezustak duela 8 urte Etxanizek profesionalismoan utzitako hutsunea beteko du; hala, mahoneroek izango dute, gertu-gertuan, nor animatu.

Debuta, ekainaren 24an 

 

Beñat Rezustak Eibarko pilotalekuan egingo du debuta, hilaren 24an: "Debuta egitea jada sari galanta izango da. Amets bat bete dut, eta orain helburua da profesionalen erritmora ahalik eta azkarren ohitzea", adierazi du. Oraingoz bi urterako kontratua sinatu du Asperekin.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.