Imanol Bolinaga Bergarako alkate izandakoa hil da

Zuriñe Velez de Mendizabal 2013ko mai. 10a, 20:58

Imanol Bolinaga (Arrasate, 1933) Bergarako alkate izandakoa hil egin da 80 urte zituela. Atzo, egubakoitza, hil zen, Alacanten, hara joana zen-eta ospakizun batera. Bihotzekoak jota hil zen. EAJko kidea zen Bolinaga eta 1983ko hauteskundeetan lortutako emaitzengatik iritsi zen alkatetzara. Bergarako udaletxean ikurrina masta erdira jarri dute krespoi beltzarekin. Santa Marina parrokian izango dira haren aldeko hileta elizkizunak, gaur, zapatua, 19:00etan.

Hamazazpi urterekin hasi zen klandestinitatean lanean 1950an Imanol Bolinaga. Ondoren, politikagintzan sartu zen eta bide luzea egin zuen. Bergarako alkatea izateaz gainera (1983-1987), zinegotzia ere izan zen ondoren, Jose Luis Elkoro alkate zenean (1987-1991). Alkate izan zeneko agintaldian, batzarkide ere izan zen Gipuzkoako Batzar Nagusietan.

Ez zen hor amaitu politikarekin izandako harremana. Besteen artean, 1988an Eusko Jaurlaritzako Turismo Sailburuorde izendatu zuten; eta EAEren ordazkari gisa, senataria izan zen Espainian, 1991tik 1999ra bitartean. Europako parlamentuan ere egon zen.

Arrasatearra sortzez (1933ko urtarrilaren 1ean jaioa), Bergaran eman zuen bizitza ia osoa. La Vergaresa autobusetako gerentea izan zen, Transconor enpresako kontseilaria eta Ecuador Bidaietako zuzendaria. 

ALBISTEAK ESKUKO TELEFONOAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.

ASTEBURUETAKO BULETINA

Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.


Harpidetza aukera guztiak