Atzokoan adibidez, Mugi gorputza izenburupean, 20 bat neska-mutil jatorrek musikarekin bat egin eta erritmo egokian dantzan aritu ziren. Gaur egungo haurrek gorputzean erritmoa eta energia dutela erakutsi zuten.
Dantzaz gain, gitarra jotzen ikasten ari diren lagunek ere kontzertu bikainak eskaini zituzten. Talde desberdinetan banatuta, batzuk binaka, beste batzuk bakarka eta azken bat talde handian, hainbat pieza jo zituzten. Zabalotegi aretoan izan ziren guraso, lagun eta senideen begirada finkoa eurengan kontzentratuta zutela.
Gitarraz gain, biolin eta tronboiek, baita biolontxeloek ere euren lekua izan zuten atzo arratsaldeko kontzertuan. Pare bat dozenaz osaturiko lantaldeak jo eta ke jardun zuen dena ongi ateratzeko eta soinu egokiak herritarrengana heltzeko. Atzokoaz gain, aste honetan ere beste kontzertu batzuk izango dira Musika Eskolan eta Zabalotegin.