Gaueko Bizikleta martxa, berriz, 21:30ean hasiko dute: "Pozik gaude, dagoeneko gainditu dugulako iaz egin genuen martxako izenemate kopurua, orduan 70 lagun izan ziren. Egunean bertan jende gehiago animatzen bada, ondo, izan ere, mendiko bizikletan gauez ibiltzearena nahiko berria da hemen, argiak behar dira... Kopuru polita da".
Ibilbide luzea kendu dute
Zapatuko martxarako antolatzaileek hiru ibilbide zituzten prestatuta, baina luzea kentzea erabaki dutela zehaztu du Osak: "Azken batean, luzea egiteko jendeak lau ordu inguru beharko lituzke eta ez da komeni gaueko irteera horrenbeste luzatzerik. Arriskua dago argi fokuak laugarren ordutik aurrera bateria gabe geratzeko, eta segurtasun arrazoiengatik, ez da komeni mendian inor argi barik geratzerik". Hala ere, ibilbide motz edo ertaina aukeratuta, ziklistak asetzeko moduko ibilbidea prestatu dute.
Arratsaldea, gazteendako
Zapatu gaueko hitzordua helduendako izango da, baina arratsaldean gazteendako hitzorduak prestatu dituzte egitarauaren barruan. Hala, Lokatzak antolatuta 16:30ean bizikleta jolasak eta Gipuzkoako eskola arteko txapelketa egingo dute, San Martin plazan. Eta 18:00etan, plazatik irtenda haur, gazte eta helduek elkarrekin itzuli bat egin ahal izango dute herrian zehar, lasai. Kartutxo gutziak, baina, ez dituzte asteburuan erreko, astelehenean (19:00etan, Irizar jauregian) Polonia diapositiba emanaldia egingo dutelako.
'Harmailatik' saio berezia
Eta, Bizikleta Jardunaldien barruan astelehenean, apirilak 29, Harmailatik saio berezia egingo dugu (22:00, Goiena Telebista). Bailaran txirrindularitzaren egoera zein den aztertuko dugu ziklismo eskolako ordezkari, entrenatzaile eta ziklista profesionalekin. Aldi berean, datorren maiatzaren 3an, egubakoitza, ziklismoko ohiko lesioak izeneko berbaldia emango dute Oreka fisioterapia taldeko lagunek (09:00, Agorrosinen). Eta Bizikleta Jardunaldiekin amaitzeko, seguruenik, parte-hartzaile gehien batuko dituen hitzordu egingo dute maiatzaren 5ean, Bergarako Aspanogi 6+3 zikloturista martxa.