"Gure ustez, Bergarak aukera ematen du kotxea alde batera laga eta herri barruko bidaiak bizikletaz edo oinez egiteko. Modu horretan denok irabaziko dugu: osasuntsuago egongo gara, gutxiago kutsatuko dugu eta gutxiago gastatuko dugu", diote jardunaldien antolatzaileek; Bergarako Udalak, Lokatza Ziklismo Eskolak eta Basque Adventurek, alegia.
Antolatutako ekintzetan parte hartzera deitu dituzte herritarrak eta Lokatzatik, gainera, Bergaran txirrindularitzako oinarrizko kategorietan egiten den lana goraipatu dute.
Ezkerretik eskuinera: Unamuno, Elorza, Askargorta, Osa eta Ugarteburu.
Egitaraua
Zapatutik, hilak 20, maiatzaren 5era egingo dituzte jardunaldiak. Askotariko ekintzak antolatu dituzte denbora tarte horretarako:
Apirilak 20, zapatua
- 09:30-12:30, Eskola kirola jardunaldia, Bergara eta Osintxu arteko bidegorrian. 130 bat ume batuko dira eta trebetasun jolasak... egingo dituzte. (Antolatzailea: Bergarako Udala)
Apirilak 21, domeka
- 10:00-13:00, Basque Adventure emakumezkoen lehen kedada, Agorrosindik Urkulura. (Antolatzailea: Basque Adventure)
Basque Adventuretik azaldu dutenez, gero eta neska gehiago ibiltzen dira bizikletan, baina bakarrik edo mutilez lagunduta ibiltzen dira kasu gehienetan; horregatik, asmoa da nesken artean ere taldeak sortzea.
Bailara mailako ekintza izango da, 30 kilometrokoa, Urkuluko itzulia moduan ezagutzen dena eta erritmo lasaian egitekoa.
Eskoriatzakoak izango sira irteteten lehenak, 09:15ean; Aretxabaletakoak batuko zaizkie, 09:30ean; eta Arrasatekoak, 10:00etan; Bergarakoekin batera joango dira Zubillagara eta han Oñatikoekin elkartu, guztiak batera Urkulura joateko.
Bide lasaia dela aurreratu dute antolatzaileek, baina aldapa dagoen tokian pista apur bat dagoela-eta mountain bike bizikleta eramatea gomendatu dute.
Doan da eta izena eman beharrik ez dago. Udalerri bakoitzeko kiroldegiko dutxak irekita egongo dira, eta parte-hartzaileek oroigarri bana jasoko dute. Bergaran, gainera, haurtzaindegi zerbitzua egongo da 10:00etatik 14:00etara.
Apirilak 22, astelehena
- 19:00etan, Irizar jauregian: Ciclotherapy. De el Cairo a Tokyo en bicicleta diapositiba emanaldia (gazteleraz). (Antolatzailea: Basque Adventure eta Bergarako Udala)
Apirilak 23, martitzena
- 19:00etan, Irizar jauregian, Mendi bizikleta, ziklismoaren ezezaguna bideo-hitzaldia, Euskal Mendi Bizikletako federazioko kide Unai Asurmendiren eskutik (euskaraz). (Antolatzailea: Lokatza Ziklismo Eskola)
Apirilak 27, zapatua
- 16:30, bizikleta jolasak eta Gipuzkoako eskolarteko txapelketa, San Martin Plazan. (Antolatzailea: Lokatza Ziklismo Eskola)
- 18:00etan, Masa kritikoa, San Martin plazatik aterata, haur, gazte eta helduek elkarrekin itzuli bat egiteko herrian zehar, lasai. (Antolatzailea: Basque Adventure, Bergarako Udala eta Lokatza Ziklismo Eskola)
- 21:30, Basque Night Adventure gaueko mendi bizikleta ibilaldia, Agorrosindik aterata. (Antolatzailea: Basque Adventure)
Bigarren urtez antolatu dute aurten eta bada nobedaderik, iaz ibilbide bakarra egon zelako eta aurten hiru aukera egongo direlako: 22 kilometrokoa, erraza; 32koa, ertaina; eta 38koa, gehiago ibiltzera ohituta daudenentzat.
Egunera arte luzatuko da izen-ematea, baina errekargua izango da jada apuntatu ez direnentzat: 17 euro ordaindu beharko dituzte federatuek eta 20 gainontzekoek. Gehienez, hori bai, 200 lagunek parte hartu ahal izango dute. Dutxak egongo dira, bizikleta garbitzeko aukera, oroigarriak eta luntxa.
Apirilak 29, astelehena
- 19:00etan, Irizar jauregian, Polonia diapositiba emanaldia (euskaraz). (Antolatzailea: Lokatza Ziklismo Eskola)
- 22:00etan, txirrindularitzaren gaineko saio berezia GOIENA telebistako Harmailatik saioan. (Antolatzailea: GOIENA)
Maiatzak 3, egubakoitza
- 09:00etan, Agorrosinen, Ziklismoko ohiko lesioak tailerra. (Antolatzailea: Oreka fisioterapia zentroa)
Maiatzak 5, domeka
- 09:00, 6+3 Aspanogi martxa zikloturista, Agorrosindik aterata. (Antolatzailea: Lokatza Ziklismo Eskola eta Aspanogi)
105 kilometroko ibilbidea izango da eta ondorengo lekuetatik igaroko da: Udana, Aztiri, Barbari, Lierni, Mandubi eta Elosuako gainak.
Aurrez izena ematen duten federatuentzako prezioa da 13 euro eta ez federatuentzat 23; egunean bertan, federatuentzat 15 euro eta gainontzekoentzat 25.
Herriko ikastetxeetan ere izango dira ekintzak: Polonia diapositiba emanaldia izango da eta irteera egingo dute Soraluzeko bidegorrira, bizikletaren onurak ezagutzeko...
Babesleak
Jardunaldietako laguntzaileak dira: Aranzadi ikastola, Ipintza institutua, Mariaren Lagundiko ikastola, San Martin ikastetxea, Oreka fisioterapia zentroa, Aretxabaletako Udala, Arrasateko Udala, Eskoriatzako Udala, Oñatiko Udala eta GOIENA.