Udal arduradunak uste dute komertzioa duten herritarrendako erreminta interesgarriak izan daitezkeela eta horregatik, gonbite berezia egin nahi diete bertaratzeko eta izan ditzaketen ekarpenak egiteko.
Herria ezagutzera ematea
Udala lanean ari da azken boladan herrira bisitariak erakartzeko eta dagoen eskaintza turistiko zabalaren barruan Bergararendako gunea egiteko. Bergarak bisitariendako erakargarri egiten duten berezko hainbat ezaugarri dauzka: ondarea, kultura, natura...
Baina bisitarien esperientzia borobiltzeko, funtsezkoa da Udalarentzat horiek guztiak ezagutzera ematea eta herrian eskaintza sendo batekin indartzea. Hala, Udalak herria ezagutzera emateko oinarrizko erremintak garatzen dihardu. Oraingoz, turismora zuzendutako web orri berria eta mugikorretarako aplikazioa -Android Market-en eta ¡Phone-n doan lor daiteke- garatu ditu, bisitariei gure herriko eskaintza zabala aurkeztu eta ikusgarriago egiteko.
Parte garrantzitsua
Aplikazioan zein webgunean, herriko eskaintza zabala osatzen duten komertzioen berri ere jaso nahi dute: jatetxeak, tabernak. ostatuak, hotelak, landa-etxeak, kirol taldeak... Izan ere, Bergarak bisitariei eskaintzeko duenaren parte garrantzitsu direla uste du Udalak.
Inpresioak partekatzeko
Eguazteneko batzarrean sortu berri diren bi erreminta horiek nola funtzionatzen duten azalduko dute, eta aldi berean, komertzioetako ordezkarien iritziz hobetu daitezkeenak ere jaso nahiko lituzkete Udal arduradunek. Horrekin batera, Udalak eta herriko eragileek bertoko eskaintza turistikoa elkarrekin garatzeko zein turismoarekin lotura interesgarritzat jotzen dituzten beste hainbat gai tratatzeko aukera ere izango da.