Horrekin batera, Udalaren erakunde autonomoen aurrekontuak ere onartu ziren: Udal Euskaltegia, 352.709 euro; Mizpirualde egoitza, 3.630.398,02 euro; eta Bergarako Bihargintza 98 SA, 357.400 euro. Hori horrela, Bergarako Udalaren 2013rako aurrekontu bateratua 24.376.965,02 eurokoa izango da.
Iazko kopuru antzerakoa
Iazko urtearekin alderatuta, %2,6ko igoera izan du 2013rako Udal aurrekontuak.
Igoera horretan eragin handia izan du Udal langileei aparteko ordainsariak aurreratzeko erabili duten 470.000 euro inguruko partidak. Mugimendu hori gabe, aurrekontu osoa 20.880.360 eurokoa izango litzateke, hau da iazkoaren –20.731.536 euro– oso antzerakoa; %0,7 handiagoa, baino ez, Udaletik azaldu dutenez. Era berean azaldu dute, aurrekontuak prestatzeko orduan kontuan hartu behar izan dutela, 2009ko Foru Fondoaren defizitaren amortizaziorako diru kopuru bat, 400.040 eurokoa, hain justu ere. Aurten bukatuko dute itzulketa osoa. Era berean zehaztu dute, Udal aurrekontuok bete egin dituztela Aldundiak garatutako Foru Arauak agintzen dituen hiru betekizunak hau da, estabilitate legea, finantza iraunkortasun legea eta gastuaren erregela.
Aurrekontua guztira
| Banaketa laburtua | 2012 |
2013 |
Aldea |
| Talde politikoen gastuak | 274.135 | 264.660 | -3,5 |
| Zerbitzu orokorrak | 1.906.401 | 1.892.012 | -0,8 |
| Udaltzaingoa eta babes zibila | 976.920 | 951.990 | -2,6 |
| Gizarte Ongizatea | 2.410.793 | 2.350.339 | -2,5 |
| Obra eta zerbitzuak | 1.536.752 | 1.593.630 | +3,7 |
| Hezkuntza | 678.981 | 680.171 | +0,2 |
| Hirigintza eta etxebizitzak | 2.737.135 | 2.495.840 | -8,8 |
| Estolderia eta ura | 1.545.330 | 1.511.640 | -2,2 |
| Kale garbiketa eta zaborren bilketa | 2.117.830 | 2.330.030 | +10,0 |
| Ingurumena | 48.700 | 37.965 | -22,0 |
| Kultura, jaiak eta gazteria | 1.493.462 | 1.426.148 | -4,5 |
| Turismoa, museoa eta ondare historikoa | 365.714 | 317.335 | -13,2 |
| Kirolak | 1.841.012 | 1.923.420 | +4,5 |
| Euskara | 674.676 | 619.615 | -8,2 |
| Auzoak eta mendiak | 362.194 | 408.264 | +12,7 |
| Gastu finantziarioak | 1.761.501 | 2.007.341 | +14,0 |
| AURREKONTUA | 20.731.536 | 20.810.400 | +0,4 |
| Paga Extra aurreratuak | - | 470.000 | |
| AURREKONTUA GUZTIRA | 20.731.536 | 21.280.400 |
Inbertsioak jaitsi egin dira
Inbertsioei dagokienez, "eta bizi dugun egoera kontuan hartuta", 110.000 eurotan murriztu behar dute horretara bideratutako diru kopurua Udal gobernutik aurreratu dutenez. Guztira 1.724.000 bideratuko ditu gobernu taldeak inbertsiotarako, iaz baino %6,3 gutxiago, hain zuzen.
Zertan inbertitu aukeratzeko orduan, berriz, etorkizunean gastu arruntak murriztea ahalbideratuko duten inbertsioak lehenetsi dituztela azaldu dute eta hiru adibide ere eman dituzte: Alde zaharreko argiteria led teknologiara pasatzea aurreikusi dute; ingurumenari begira, energia aurrezteko proiektua ere garatuko dute; eta uraren kontsumoa eta estolderia hobetzeko inbertsioak ere egingo dituzte, beste inbertsio batzuen artean.
EAJ eta PSE-EE aurka
Oposizioko alderdiek aurrekontuon kontra bozkatu zuten astelehenean. Alderdi jeltzaleari dagokionez, Juanje Alberdik hartu zuen hitza eta berak eman zituen batik bat, Aintzane Oiarbiderekin batera, euren ezezkoaren arrazoiak. Batetik, "gastu arrunta murrizteko esfortzurik ikusten ez" dutela azaldu zuen, baina bestalde, "tasak igo egiten" direla ; bestetik, kezka adierazi zuen "herrirako proiektu falta" ikusten dutelako: "Herriko merkataritza edo industria bultzatzeko proiektu estrategiko falta" eta zentzu horretan, gobernu taldeak proposatutako Mekolaldeko lotunea hortik kanpo laga dute, "dirua iniziatiba pribatuak jarri duelako.
PSE-EEk, bestalde, "itxurazkoak" direla uste dute, "ez dutelako islatzen aurrekontu-ekitaldiaren errealitatea eta aurreko urtekoaren kalkoa dira".