Iazko maiatzean Euskal Herri mailako EuskoSkills lehiaketa irabazi ondoren, EAEko LHko hainbat ikaslek Madrilen jokatu diren SpainSkills Olinpiadetan parte hartzeko txartela lortu zuten. Euskadiko ordezkari bezala, 21 laguneko taldea osatu da 18 skill-etan banatuta.
Euskal Herriko formazio maila altuaren erakusgarri, ondorengo datuak: 7 urrezko domina, 6 brontzezko eta bi bikaintasun aipamen lortzea, eta Kataluniaren ondoren domina gehien lortu dituen komunitatea izan da (guztira 13 domina irabaziz).
Mekatronika alorrean 9 ikastetxek parte hartu dute, horien artean Miguel Altuna Ikastetxeko Roberto Martin eta Javier Ozaeta txapeldunak izan direlarik. Lehiaketa honetan 6 probari aurre egin behar izan diete: Hiru maketa muntatu, elkarrekin programatu eta mantenu lanak egiteaz gain, maketaren funtzionamendua optimizatzea lortu zutelarik, horretarako zituzten 7 orduetan.
Beraz, Bergarako Miguel Altunako irabazle hauek, mundu mailako lehiaketan parte hartzeko aukera izango dute, 2013ko uztailean, Alemaniako Leipzigen jokatuko diren WorldSkills lehiaketan, hain zuzen ere.