"Ez da oso erraza disko hau definitzen, erritmo latindarrak, runba, reggae... estilo aldetik oso anitza da. Abeslari berria ere proposatzen dugu, Eneko Longarte durangarra izango da Emonen ahots nagusia aurrerantzean".
Konfeti kolore diskoa oso alaia eta erabat festa girokoa da. "Abesti batzuetan bertsolari gazte batzuen laguntza ere izan dugu. Letrak positiboak dira; hala ere badira pare bat abesti alde kritikoa jorratzen dutenak: Kukutzako gaia eta euskal gazteriarena, hain zuzen ere".
Diskoa lagunartean egin dutela kontatu digute. "Mutrikuko AME estudioan grabatu dugu eta Donostian Doctor Master-en masterizatu. Harribitxien artean, La Pegatina talde katalanaren kolaborazioa izan dugula esan dezakegu. Gustuko dugun talde bat da gainera".
Aurkezpeneko lehen kontzertua iparraldean egingo dute, Zuberoako Sohuta herrian. Baina, martxoaren 9an Elgetako Espaloia Antzokian izango dira festarako doinuekin.
