Bergaran, urtero moduan, giro ederra izan dute Buruñao auzoan. Jende dezente gerturatu da ermitara besteak beste, Jon Molina parrokoak opilak bedeinkatu zitzan. Egin beharrekoak eginda, ospakizunak etorri dira gero.
Aranzadi Ikastola-Moises Azpiazu taldeko neska mutikoek dantza ikuskizun benetan ederra eskaini dute. Ondo gaztetxoak ziren asko eta asko, baina lan bikaina egin dute guztiek; ikurrin dantzak eta agurrak sekulako txalo zaparrada jaso zuten. "Benetan hunkigarri da horrelako neska-mutiko gazteak euskal dantzak egiten ikustea. Gozatu egin dut", zioen bergarar batek. Dantzen osteko herri kirolek ere jende dezente erakarri dute.
Elgetan ere egun handia
San Blas eguna Elgetan ere oso errotuta dago eta bat baino gehiago izaten dira opilak bedeinkatzeko aukerak. Zapatu iluntzean esaterako herritar asko batu ziren herriko elizan eta gaur eguerdian ere talde polita elkartu da. Horrez gain, Arantzeta auzoko San Blas ermitan ere gaur goizean izan da opilak bedeikatzeko aukera.
Antzuolan Besalde auzoan
Antzuolan ere ospatu zuten San Blas eguna; kasu honetan atzo, zapatua. Besalde auzoko San Blas ermitan meza egin zuten eguerdian eta ondoren salda eta txorizoa banatu zuten. Trikitilarien laguntza izan zuten giroa berotzeko.