Zapatuan Labegaraietan jokatutako partidua horren erakusle izan zen. Partiduaren hasieratik, etxeko taldeak baloiaren jabetza izan zuen eta markagailuan aurre hartzeko ez zuten arazorik izan.Nahiz eta Bergara joko aldetik Tapagaran baino hobeto ibili, bergararrak erasoan ez ziren fin ibili eta atsedenaldia baino lehenago partidua erabakita uzteko aukerak ez zituzten aprobetxatu (16-13).
Atsedenaldiaren ostean, mahoneroak indarberrituta irten ziren eta hasieratik partidua ahalik eta azkarren erabakitzera irten ziren: eraso bakoitzean jokaldia bukatzen zuten. Lehenengo zatian, etxeko taldeak baloi jabetza luzeetan galerak izaterakoan, bizkaitarrek golak egiteko aprobetxatu zuten; bigarrenean, berriz, jokaldi gehienak jaurtiketarekin bukatzen zituztenez, kanpoko taldeak bergararrei min egiteko aukera gutxiago izan zituen. Gauzak horrela, mahoneroak gero eta konfiantza handiagoarekin jokatzen hasi ziren eta ez-ohiko gol festa hasi zuten: denbora bakar batean 23 gol egin zituzten.
Zortzi puntutatik sei eskuratu
Azken lau jardunaldietan ateratako emaitzei esker –bi berdinketa eta bi garaipen–, Soraluze BKEk sailkapenean gora egin du eta badirudi aurten ez dituela izango beste urte batzuetan izandako estutasunak, eta denboraldia goiko postuetan bukatzeko borrokatzeko lehian izango direla, 3. sailkatutik 8.era hiru puntuko aldea baino ez dagoelako.