Berez abenduko azken astean eman zituen jakitera Bedelkarrek erakusleiho txapelketako lehen hiru sarituen izenak, baina zapatuan, urtarrilak 5, egin zuten sari horien banaketa. Epaimahaiaren ustez, erakusleiho politena Igarza mertzeriarena izan da (200 euro). Bigarren saria Gorosti loradendak (150 euro) eskuratu du eta hirugarrena, berriz, Ninika loradendak (100 euro)". Hirurek, udalak emandako dirusaria eskuratu zuten zapatuko ekitaldian.
Epaimahaiak izendatutako erakusleihoak ez ezik, herritarrek aukeratutakoak ere saria jaso zuen atzo: Mirari jantzidendak irabazi du aurtengo Gabonetako herritarren saria (100 euro). Bestalde, botoa eman zuten herritarren artean ere banatu zuten saria, hain zuen, Bedelkarreko komertzioetan gastatzeko 150 euroko bonoa. Eta sari hori Yamila Gallegok irabazi zuen, parte hartu zutenen arteko zozketa eginez.
Bestalde, 75 marrazki aurkeztu dituzte 13 urte arteko gaztetxoek aurtengo lehiaketara eta txapelketa horren sari banaketa ere atzoko ekitaldian egin zuten. Kategoria bakoitzean lehen saria irabazi zutenek jaso zuten saria hala nola: Oier Sanchez (5 urte), June Etxabarri (6-7 urte), Alazne Urkiola (8-9 urte), Eider Etxaniz (10-11 urte) eta Amaia Etxaniz (12-13 urte). Marrazki horiek Bedelkarreko denda eta komertzioetako erakusleihoetan egon dira ikusgai Gabon egunetan.
Horrez gain, Peter Panen ipuin ezkutua aurkitu dutenen artean ere egin zuten zozketa saribanaketan. Kasu horretan, Ainhoa Lekuona Irigoien izan zen irabazlea (150 euro).