Ertzaintzak prentsa ohar bidez jakinarazi duenez, 12:00etarako minutu gutxi batzuen faltan jaso zuten deia. San Juan auzoko enpresa bateko arduradunak bertara joateko eskatu zien, langileek materiala ostutzen atzeman zituzten hiru pertsona atxikita zituztela-eta. Dirudienez, ibilgailu bat enpresaren barrutira sartzerakoan aprobetxatu zuten "gaizkileek" ere barrura sartzeko, bertan zegoen kobrea lapurtzeko helburuarekin.
Ertzainek, bertara iritsitakoan, egiaztatu zuten euretako batena zen autoan kobrezko 25 pieza kargatzea lortu zutela. Ustezko hiru gaizkileak atxilotu eta ertzain-etxera eraman zituzten, epailearen eskuetan uzteko tramiteak abian jartzeko.