Eskenatokiaren erdian, istorioko izarra zen erlauntzaren alde bietan banatuta, 44 neska-mutiko zeuden; txikienak 4 urte zituen eta 9 berriz, handienak. Eskuinetara, Marije Ugaldek, Eskolako zuzendariaren gidaritzapena, talde istrumentala: Ane Zangitu, txeloan; Nekane Gabilondo flautan; Marijo Juaristi klarinetean eta Angel Agiriano akordeoiarekin. Guztiak, eskolako irakasleak. Ezkerretan, gehienbat kantuz kontatutako istorioaren haria lotzen zuen Aitzol Mujika, ikasle baten aita, narratzaile lanetan. Horiek guztiak ikuslearen bistara, taularen gainean, besteak beste, gurasoek egindako tximeleta, belar edo itsasoaren irudiekin apainduta. Efekto bereziak ere izan ziren gainera!
Atzean, berriz, hilabetetako lana eta eskarmentu handiko profesionalak lan-taldean, horien artean: David Azurtza konposatzailea; Joxemari Iturralde, idazlea; Valen Moñux eskenografiaren arduraduna.
Ikusleen konplizitatea
Jarlekuak beteta, aretora sartzeko ilara egin zuten gurasoak eta senitartekoak gehienak. Kamarak eskuetan eta aurrean zutenari adi begira. Etxeetan egindako horrenbeste entsegu eta prestaketa lanen ondorioz, aretoko 2 aldetan nabaria zen ilusioa eta konplizitatea.
Estreinura joandako ikusleak aretotik orduko, zain zeuden kanpoan bigarrenerako ikusleak. Protagonistak, gogotsu, eta lasaiago, berriz ere taula gainera igotzeko. Egindako lanaren fruitua dastatu genuen Zabalotegin, baina izango dira aukera gehiago, urte bukaeran Tolosan egitekoak dira eta ibarrean ere gehiago egin gura dute.