Euskal Herriko Trikitixa eguna arrakastaz ospatzen ari da Bergaran. Eta Gure trikitixa eta panderoa osasuntsu daudela argi geratu da. "Sekulako loraldia bizitzen ari da trikitixa. Euskal Herriko eskolak nola dauden ikusi besterik ez dago, bete-beteta", azpimarratu du Agurtzane Elustondo legazpiarrak. Bera da Euskal Herriko Trikitixa Elkarteko lehendakaria. Balorazioa egiteko ere eskatu diogu: "Eguraldi kaxkarra izan dugu goizean, baina jendea animatu da. Sekulako giroa izan dugu eguerdi partean udaletxeko arkupetan. Herri askotatik etorri da jendea: Oñati, Azkoiti, Lezo, Pasaia, Aztigarraga, Donostia, Bergara... oso pozgarria da hori guretzat".
Euriagatik, udaletxeko arkupetan inprobisatu dute eszenatokia. Bergarako trikiti eta pandero-jotzaileek estreinatu dute erromeria librea. Des-Kontrol edota Ken Zazpi taldeen triki-bertsioek jendea erakarri dute eguerdian. Txalo artean jaso dituzte parte-hartzera animatu ziren gaztetxoak.
Ondoren, 315 bat lagunek bazkaria eta erromeria egin dute pilotalekuan egunari bukaera borobila emateko asmoz.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.