Antolatzaileek ahalik eta herritar gehien batu nahi dute plazan eta zarata eginez ozen esan murrizketen aurka daudela. Zentzu horretan behin eta berriz azpimarratu dute mugimendu zabala dela eta profil ezberdinetako jendea batzea litzatekeela helburua: "Mugimendu erabat irekia da. Murrizketen kontra eta zentzu horretan azken aldian hartu diren erabakien aurka ahotsa altxatzea nahi dugu, baina inolako aldetan kokatu barik. Ekimen zabala izatea lortu nahi dugu".
26 guztietan kalera
Filosofia eta helburu horrekin jaio zen B26 mugimendua: hileko 26. egunetan kalera atera eta modu ezberdinetan murrizketa sozialen kontra protesta egitea. Irailaren 26ko greba orokorraren ostean Bergaran sortutako mugimendua da B26. Manifestazio benetan jendetsua izan zen egun hartan eta herritarren egonezin hori azaleratzen jarraitu nahi dute.