Joseba Egibarrek, Bakartxo Tejeriak eta Iñigo Urkulluk esku hartu zuten mitinean, eta gogoz txalotu zituzten bertaratutako herritarrek.
Sozialistei eta EH Bildukoei kritika zorrotzak egin, eta herri hau aurrera ateratzeko bermea agindu zuten.
Joseba Egibar izan zen hitza hartzen lehena eta Bakartxo Tejeria bigarrena.
Egia ezkutatu
Egibarrek sozialistei egia ezkutatzea eta programarik ez izatea egotzi zien, eta EH Bildukoei euren arazoak konpontzeko denbora behar dutelako hartu izana instituzioetara etortzeko erabakia, gaineratuz euren arazoak eta herri honen lehentasunak ez datozela bat. EAJk fidagarritasuna eskaintzen duela esan zuen eta urtetan erabakiak hartzen asmatu izana, herritarrekin kontatuz beti; alderantziz, herritarrekin ez kontatzea eta herritarrak errespetatu ez izana egotzi zien batzuri.
Egungo lehendakaritzaren ereduak jarraitzen badu, herri honek hondamendi ekonomikoan amaituko duela esan zuen Tejeriak, eta EH Bilduk ez duela EAJ ordezkatuko ohartarazi.
Jendeari erantzun
Eta ostean iritsi zen momentu gorena, Iñigo Urkullu lehendakagaria taularatu zenean. Hauteskunde kanpainan zehar hurbildu zaien jendeari egin zion erreferentzia, jende horri erantzuten asmatu egin behar dutela esanez, etorkizuna irabazi eta herri hau aurrera ateratzeko.
Herritarrek eguneroko kezkak dituztela azaldu zuen eta erreferentzia zuzena egin zien enpresariei, kezkatuta daudela esanez. Eskaerak badituztela baina finantziaziorik ez, eta erakundeetan ez dutela babesik topatzen; Urkulluk laguntza agindu zien.
Krisiari aurre egiteko plana
Zulorik gabeko gobernua agindu zuen, Gipuzkoak eta Euskadik krisiari aurre egiteko plana izango dute hitzeman eta pentsioak bermatuko dituztela azpimarratu. Eta gazteei zuzendu zien azken hitza, bizitza propioa eraikitzeko lana topatzea dutelako amets. Urkulluk lana ez, baina laguntza guztia agindu zien.
Garai zailak ditugula aurretik onartu zuten, baina den-denak irtengo garela agindu. Herri hau aurrera ateratzeko bermea eurak direla esan eta botoa eskatu zuten.