Bergarako Udala pozik dago azken urteetan Aroztegik izan duen bilakaerarekin eta 2013an ere erakusketek aurten besteko arrakasta izatea espero dute, "behar besteko esfortzua" egingo dute horretarako. "Aretoak hasieratik izan du erantzun ona, baina gaur egun badago jende bat erakusketa guztietara etortzen dena. Hori mantendu beharra dago", azaldu du kultura zinegotzi Leire Iruinek.
Dena dela, kultura zinegotziak gogorarazi du eskaera egiteak ez duela esan nahi Aroztegiko urteko programazioan onartua izango denik. Izan ere epaimahai batek erabakitzen du hori; BEARTeko Bingen de Pedro eta Luis Laskurainek, Pol-Pol Argazki Taldeko Benito Kanterok eta Udaleko kultura eta turismo ordezkariek osatutako epaimahaia da.
2012an, esaterako, hemeretzi eskaera jaso zituen Udalak eta hamalau erakusketa egingo dira guztira. Orain arte egin direnen artean badira bi bereziki arrakastatsuak izan direnak. Lehenengoa Mikel Diazena, haren familiak eta BEARTeko kideek elkarrekin antolatutakoa eta Bergara 1936 bestea. Kultura zinegotziaren esanetan Bergarako argazki zaharrak batu izan dituzten erakusketa guztiak oso arrakastatsuak izan dira beti.