Tavex enpresako langile asko langabezian geratu ziren eta beste asko erretiratu egin zituzten eta ordainetan gehigarri batzuk adostu zituzten Belgikako borondatezko gizarte aurreikuspenerako erakunde edo aseguru etxe batekin (Vitalia). Aseguru poliza hori kontratatzea oinarrizkoa izan zen negoziazio prozesuan. Bada erakundeak porrot egin du eta Belgikako Gobernuak kontrolatzen duenetik 200 langile inguru dirurik jaso gabe gelditu dira, tartean Bergarako Tavexeko langileak.
Izaskun Bilbaoren galdera
EAJk auziaren inguruko informazioa eskatu du Europako Parlamentuan. Bergarako EAJ publiko egindako prentsa ohar baten azaldu dute galdetu dutela "ze bitarteko dauden Estatuko mugez haratago porrot egindako enpresei aurkeztutako erreklamazioak azkartzeko, zehazki borondatezko gizarte aurreikuspeneko erakundeen kasuan eta batez ere langileen gizarte eskubideei eragiten dienean, langile horiek Europako beste estatu batean bizi, kotizatu eta lan egiten dutenean".
Bestetik, EAJko parlamentari Izaskun Bilbaok bere galderetan gogorarazi zuen bereziki Tavexeko langileen kasuan espainiar auzitegiek, datu guztiak aztertu ostean, langileei arrazoia eman dietela, hau da, langileekiko duten zorra aitortu zaiela.
Bergarako EAJko ordezkariak Tavex enpresako kaltetuekin harremanetan jarraitzen dute eta enpresako sindikatuak Europako Parlamentuan egindako eskaeraren inguruko dokumentazio guztia jaso dute. Dena dela, hurrengo astean langileek bilera egingo dute EAJk ordezkariekin auziaren jarraipena egiteko.