Bada, norgehiagoka berdinketarekin amaitu behar zela zirudienean, estrategia jokaldi baten heldu zen etxekoen gola. Arauzko denbora gaindituta zela heldu zen, korner baten. Julen Iñurrategi atzelariak burukada eder batekin sareetara bidali zuen baloia.
Bi taldeak, oso lehiakorrak
Nicasio Galan Neka Bergarako entrenatzailearen arabera, asko borrokatutako partidua izan zen. Ondarroako taldea goraipatu zuen: "Oso talde lehiakorra da, asko borrokatzen duena. Ez dute asko nabarmentzen den jokalaririk baina talde moduan oso ondo funtzionatzen dute. Irabazteko talde zaila da".
Bergara, baina, ez da kikiltzen den taldea: "Defentsa lan ederra egin dugu. Eta maila honetan bereziki garrantzitsua da atzean ondo aritzea". Estatistikek defentsako lan ona berresten dute, Bergarak hiru partidutan gol bakarra jaso du-eta. Datorren jardunaldian derbia jokatuko dute Aretxabaletaren aurka.