Gaur egungo komunikazioaren gizartea omen den honetan; telebista, kablea, interneta, mugikorrak... zertarako irrati libre bat Bergara batean?
Galdera horri Txapa irratiko asanbladako kide bakoitzak modu ezberdinean erantzun liezaioke, bakoitzak bere arrazoiak baititu mikro baten aurrean jarri eta bere berea den saioa besteei eskaintzeko. Musika saioak, kontrakulturalak, kontrainformatiboak, umorezkoak, kolektiboenak, norbanakoenak... denetarik egongo da aurten ere Txapa irratiko programazio berrian –urrian zehar aurkeztuko dute–. Bada, edozein herritarrek izan dezake bere tartea Txapako programazioan
Txapako kideen arabera, "inoiz baino beharrezko gara komunikabide herritarrak, herritik herriarentzat eginak. Inoiz baino beharrezko merkatutik eta boteretik at dauden komunikabideak, herriko kolektibo eta proiektu ezberdinei ahotsa emango dietenak". Hori horrela, Txaparen programazioan parte hartzeko dei egiten diete herritarrei, eta horretarako hilaren 23an, domeka, 19:30ean gaztetxean egingo duten asanbladara gonbidatzen dituzte. "Anima zaitezte! Gerturatu irratira, ikasi beharrezko diren lau botoi erabiltzen eta salto egin 97.20ra", diote.