Real Sociedadek Zaragozaren aurka lagunarteko partidua jokatu zuen atzo Agorrosinen. Bergararrak, debagoiendarrak eta eskualdetik kanpokoak ere, jende piloa batu zen harmailetan eta zelai inguru guztietan txuri-urdinak animatzeko. Emaitza 2-1 izan zen, baina garrantzitsuena giroa izan zen: zaleen beroa igarri zuten txuri-urdinek, eguraldiaren bero itzelaz gain.
Atzoko partiduko izarra Agirretxe izan zen, berak egin zituen-eta Realaren bi golak. Realzaleek txalo, txistu, arbitroari errieta… denetarik egin zuten. Bergarako bandak ere bere onena eman zuen, animatzaileak animatzen. Azkenean, 2 eta 1 txuri-urdinak garaile.
Antolatzaileak, Bergarako Realaren lagunartekoak, oso pozik zeuden sarrerarekin –zelaia bete egin zen eta sarrera asko aldez aurretik saldu zituzten– eta atzoko futbol jaiarekin: "Egun polita da Bergararendako", esan ziguten.
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Batu zaitez Goiena albisteen kanalera.
TELEGRAM: Batu zaitez GoienaAlbisteak kanalera.