2009an abiarazi zuten Soraluce, Etxetar, Goratu, Danobat eta Zayer enpresek eta zientzia eta teknologiaren sareko hiru agentek Hiperion proiektua, eta gaur aurkeztu dituzte elkarlan horeen emaitzak Soraluce lantegian egindako ekitaldian. Bertan, besteak beste Patxi Lopez lehendakaria izan da, baita Martin Garitano diputatu nagusia eta Jaurlaritzako Industria, Merkataritza, Berrikuntza eta Turismo sailburu Bernabe Unda ere.
Proiektuaren helburua da makina-erramintaren euskal partzuergoa pieza handientzat doitasunezko makinen munduko lehen erosketa aukera izatea, eta era berean, Euskal Autonomia Erkidegoa hazkunde iraunkorreko lurralde bezala sustatzea. Lortutako emaitzei dagokienez, Hiperion proiektuari esker lau patente berri eta patenteei buruzko zazpi bideragarritadsun ikerketa lortu dira.
Alor publiko eta pribatuaren arteko elkarlana
Jaurlaritzaren Etorgai ekimenak diruz lagundutako proiektua izan da Hiperion, eta Patxi Lopezek, gainerako sektoreentzat adibide gisa jarri du: "Hiperion proiektua ekonomiaren beste alorretan egin behar dugunaren adibide aproposa da" esan du Lehendakariak, eta gaineratu du, Hiperion bezalako proiektuak direla beharrezkoak krisiari aurre egiteko.
Orotara, 11,5 milioi euroko aurrekontua izan du Hiperionek, eta horietako 8,8 ikerkuntza eta garapenean inbertitu dira. I+G alorrean egin du bere ekarpena Jaurlaritzak, 3,1 milioi euroko laguntza emanaz; enpresek eurek, 5,7 milioi euro erabili dituzte ikerketa eta garapenerako. Hala, Lopezek esan du kasu honetan, inbertitutako euro publiko bakoitzeko ekimen pribatuko ia bi euro inbertitu direla. Zentzu horretan, esparru publiko eta pribatuaren arteko lankidetzaren garrantzia azpimarratu du lehendakariak, baita ikerketa eta garapenean egindako apustua ere.
Europako Inbertsio Bankutik, 460 milioi euro
Gaur Bergaran egindako agerraldian Patxi Lopezek iragarri du era berean, Europako Inbertsio Bankuak 460 milioi euroko mailegua eman diola Eusko Jaurlaritzari, eta baldintzak oso onuragarriak direla. Lehendakariaren esanetan, mailegua lortu izanak erakusten du Jaurlaritzaren proiektuek "konfiantza" sortzen dutela.