Zer moduz zaude?
Pozik eta gogotsu. Pozik, ia duela bi urte nire herritik indarrez eraman eta gero, berriz hemen, etxeko goxotasunean nagoelako. Eta gogotsu, orduan nire lan politikoagatik zigortu nahi izan banindute ere, orain, eta kaleratzean, gazte mugimenduan, lanean jarraitzeko aukera berreskuratu dudalako.
Zer izan da gogorrena?
Espetxetik atera eta kideak bertan bahituta gelditzea. Euskal herritar gehiegi izan gara espetxea ezagutu dugunak, eta espetxeko atea gurutzatu arren, pareten bestaldean lagunek preso jarraitzen dute; etxetik urrun, isolatuta, eta asko, oso baldintza latzetan.
Segik bere jarduna bertan behera utzi du. Ze iritzi duzu?
Segik bere jarduera uzteak ez du etxera goazela esan nahi; nik, behintzat, ez dut horrela bizi izan, guztiz kontrakoa. Segi borrokarako, gazte antolakuntzarako tresna izan da, eta orain, bere topea jo duen arren, bertako kideok borrokan jarraituko dugu anbizioz eta ilusioz, gazte herria dugu-eta eraikitzeko.
Nola ikusten duzu etorkizuna?
Etorkizun hurbilari dagokionez, urte luzeetan, borrokaren, herritarron lanaren bidez sortutako baldintzek Euskal Herrian aukera berriak zabaldu dituela uste dut eta guri dagokigu, zain gelditu gabe, erantzukizunez, loratzen ari den herria ereiten jarraitzea; preso eta iheslariak etxera ekarri eta gure herria askatasunera eramatea.