Zapatuko hitzordua
Bergarako Orkestra Sinfonikoak urtero ekainean egiten duen kontzertua eskainiko du bihar, Santa Marina elizan, 20:00etan eta 45 minutu inguru iraungo du. Hain zuzen ere, bost obra eskainiko dituzte eta kontzertua amaitu aurretik, sorpresa gisa, musika irlandarra eskainiko dute. Hitzordu hau herritar guztiendako da eta doakoa izango da. Alfredo Gonzalez Chirlaque orkestra zuzendariaren arabera: “Kontzertu hau urtero egiten dugu kurtsoari amaiera emateko”. Izan ere, kontzertu honetan entzungo diren obrak ikasturte osoan zehar entseatu dituztenak izango dira. Kontzertu horretaz gainera, Bergarako Orkestra Sinfonikoak beste kontzertu bat eskainiko du ekainaren 29an, Elorrioko Parrokian, 22:00etan.
Hitzordu honetan entzungo direnak: Cuarteto para Cuerdas en Re Mayor, Primer Tiempo, Lo egin maitea, BSO Forrest Gump eta ABBA.
Domekako hitzordua
Domekako hitzordua, berriz, goizean izango da. Izan ere, 11:30ean Bergarako Udal Musika Bandak kalejira egingo du Bergarako hainbat kaleetan zehar. Kalejira Bidekruzeta auzoan hasiko da eta San Pedro, Burdinate eta Barrinkaletik igaroko da San Martin plazara iritsi arte. Chirlaquek zehaztu du "kalejira honek 30 minutu" iraungo duela. Eta kalejira amaitzean, Udal Musika Bandak kontzertua eskainiko du Espoloian 12:30ean. Hain zuzen ere, sei obra entzuteko aukera egongo da, Chirlaquek adierazi duenaren arabera. Kontzertu hori ere herritar guztiei zuzendutakoa eta doakoa izango da.
Hitzordu honetan entzungo direnak: Campo de Rosas, Ivanhoe, Suit provençale, Katiuska, The Girls of Jobim, Umore ona.