Jolas parkea izan da gaur Bergaran gaztetxoek gehien zapaldu duten gunea eta, euren eguna izanik, izugarri ongi pasatu dute puzgarrietan saltoka; zalantza barik, eurak izan dira protagonistak gaur.
Baina gaurko egitarauak eurentzako ez ezik beste adin tarteetarako ekintzak ere jasotzen zituen, noski, eta hori horrela, San Martin plazan batutakoek herri kirol erakustaldiaz gozatzeko aukera izan dute. Hiru aita semek jardun dute lanean: Iñaki eta Inaxio Perurena harri-jasotzaileek; eta Zelai II eta Ioritz Zelai, eta Bihurri eta Hodei Ezpeleta aizkolariek.
Musikaz gozatzeko aukera, bestalde, Domingo Irala kalean izan da: Alma Navarra taldeak jota eta abesti latinoen saioa egin du.
Arratsaldean bingoa
Horiek izan dira goiz-eguerdiko ekitaldi nagusiak, eta arratsaldean gehiago izango dira, noski; tartean, aurtengo berrikuntzetako bat: bingoa, Munibe plazan, 18:00etan.
Eta jaien hasiera Bitorianatxoren jaitsierak markatu bazuen, beronen igoerak emango die amaiera Bergarako Pazkoei; gauerdian izango da, San Martin plazan.
