Euskararen Espektakulue izeneko bakarrizketa urtarrilaren bukaeran aurkeztu zuten Aretxabaletako Arkupen, eta, orain, ikuskizun hori zabaltzea erabaki du artista bergararrak. Hala, egubakoitz iluntzean, bi emanaldi eskaini zituen Bergarako Zabalotegin. Aretoa ez zen bete, baina publikoaren feedback ona egon zela adierazi du Vegak eta pozik azaldu da.
Umorea oinarri
Euskaldunok eguneroko bizitzan erdarara jotzeko dugun joera oinarri hartuta, umore ukituko bakarrizketa egiten du Vegak espektakuluan. Telebistan oso hedatuta dagoen formatua erabiltzen du eta gai batetik bestera salto egiteko, bideoak eta musika erabiltzen ditu. Helburua ikusleak gaiaren gainean hausnartzea da.
Kepa Errastiren bideoak
Ikuskizunean tartekatzen diren bideoak Kepa Errasti zinegile aretxabaletarrak zuzendu eta editatutako sketch-ak dira. Hauek ere umorea dute oinarri eta ikusleen barre algarak eragin zituzten.
Ikuskizuna Aretxabaletako Loramendi elkartearen eskaera izan zen, baina Aretxabaletan izan zuen arrakasta ikusita, beste herri batzuetan egitea erabaki zuten.