Arcelor-Mittalek Olaberrian, Zumarragan eta Bergaran dituen lantegietan, eta Zaragozakoan, kokatu nahi ditu Madrileko Villaverden itxi duen plantako langileak. Multinazional indiarrak birkolokatu nahi dituen 200 langile horien artetik, gehienek, 160, Gipuzkoako lantokiak aukeratu dituzte. Bereziki, Olaberriako lantokirako eskaerak egin dituzte langile horiek eta, gutxiago, Zumarraga eta Bergarakoetarako.
Aurreikuspenen arabera, 80 langile birkolokatu nahi dituzte Olaberrian eta beste horrenbeste Zumarragako eta Bergarakoen artean, baina Bergarakoan gutxienak dira.
Bestalde, Gipuzkoako hiru lantegietan lanean diharduten 900 langileendako aurre-erretiro plan bat prestatu du Arcelor-Mittaleko zuzendaritzak eta sindikatuekin negoziatu nahi du plan hori.
Madrileko Villaverdeko planta ixteak lan gehiago ekarri du Gipuzkoako lantegietara.
Krisiak eta Espainia barruko merkatuaren moteltzeak ekarri du Madrileko plantaren itxiera. Eta, Gipuzkoako lantegiak irabazle atera dira itsasotik gertuago egotearren. Hain justu ere, Pasaiako portua gertu izateak Gipuzkoako planten alde jokatu du, kasu honetan.