Denboraldi hasieran jarritako helburua beteta bukatu du Soraluce BKEk liga: mailari eustea. "Puntu beharrean geunden eta azken partidua izanda, emaitza zen garrantzitsuena. Gaizki jokatu dugun arren, lortu dugu irabaztea. Oso urduri jokatu dugu" adierazi zigun Josetxo Muniategi entrenatzaileak amaieran.
Joko gutxiko partidua
Lehia oso parekatu izan zen zapatu arratsaldean Labegaraietan jokatu zena. Lehen zatian joko hobeagoa ikusteko aukera izan zen, jokaldi luzeagoak eta talde jokoa. Hasieratik hasi ziren irabazten bergararrak, baina, indarrak oso berdinduta izan ziren eta puntu bateko aldea lortu zuten asko jota. Lehen zatia bukatzeko minutu bat falta zenean, Muniategi entrenatzaileak hutsartea eskatu zuen, izan ere, azken erasoa eurena zen eta gola sartzea oso garrantzitsua zen atsedenaldira lasaiago joateko. Eta baita sartu ere. Hala, bi puntuko aldeaz amaitu zen lehen zatia (18-16).
Bigarren zatian, aurkaria etxekoen jokoa apurtzera irten zen eta Muniategiren mutilek ez zuten horri aurre egiten jakin. Lehia amaitzeko hamar minutu gelditzen zirenean, defentsa aurreratua egitea erabaki zuen aurkariak eta orduan jokatu zuten hobeto bergararrek; lehiako alde handiena atera arte, lau puntu (34-30).