Argazkiez gain, testuinguru historikoa azaltzeko helburuarekin, II. Errepublikako eta Gerra hasierako dokumentuen digitalizazioak ere bildu dituzte antolatzaileek. Irudiak eta testuak erabilita, Bergarako garai hartako egoera islatzea da asmoa.
Erakusketa elkarlanean antolatu dute Udal Artxiboak eta Intxorta 1937 Kultur Elkarteak. Artxiboak, dokumentu funtsak gordetzeaz gain, Bergarako argazki funtsa eta bilduma ugari ere gordetzen ditu, ondarea zaindu eta kontsultagarria izan dadin. Intxorta 1937 Kultur Elkarteak, berriz, gerra eta frankismo garaia ikertzea eta memoria berreskuratzea du helburu.
Ikusleen parte hartzea
Antolatzaileen arabera, erakusketak bi helburu ditu. Batetik, udal artxiboko argazkiak erabilita herritarrek garai latz haietako lekukotasunak ikustea. Bestetik, informazioa jasotzea; izan ere, ikusle guztiei parte hartzea eskatzen diete. Nola? Argazkietan agertzen diren pertsonak identifikatzen; horrela, informazio hori Intxorta 1937 Kultur Elkarteak egiteko asmoa duen ikerketan erabili ahal izango du.
Erakusketa martxoaren 30etik apirilaren 29ra arte izango da ikusgai Barrenkaleko aretoan, ohiko ordutegian.