Angiozarko trikitilarien atzoko emanaldiak iraun zuen ordubete pasatxoan, asko izan ziren jo zituzten piezak. Batzuk betiko doinu ezagunak, Xabier eta Iker anaiek jotako Martxa baten lehen notak, esaterako; beste batzuk ez hain betikoak baina bai ezagunak, adibidez, trikitilari guztiek batera eskaini zuten Ai seu te pego.
Argi geratu zen instrumentu bat jotzen ikasteko ez dagoela adinik; izan ere, hainbat guraso ere badabiltza panderoa eta trikitia jotzen ikasten, eta euren emanaldiekin txalo zaparrada beroak jaso zituzten. Oñatitik joandako gonbidaturik ere izan zuten, eta hala, Agur eta Ezozik osatutako bikote oñatiarrak hainbat pieza jo zituen. Festa ez zen bukatu saloiko emanaldia bukatzean; kalean jarraitu zuen kalejirarekin eta ondoren, afariarekin.
Harkaitz Allur trikiti irakaslea pozik zegoen kontzertuak emandako arrakastarekin: "Beldur apur bat nuen, neska-mutikoa bost hilabete bakarrik daramatzatelako ikasten, baina publiko ona izan dugu eta sekulako giroa egon da".