Dokumentala eta hitzaldia
Joan den asteko martitzenean Izan, egin, eragin izeneko dokumentalaren emanaldia izan zuten gaztetxean. EHEen ibilbidearen gaineko ikus-entzunezkoa da eta batez ere gazte jendea erakarri zuen.
Eguaztenean, bestalde, hitzaldia eskaini zuen Iñaki Martinez de Lunak kultura etxean. Euskaraz bizitzeko ditugun oztopoen gainean jardun zuen eta baita eman beharreko urratsez ere.
Asteburuan, festa giroa
Egubakoitzean bertso afaria izan zuten Agorrosingo tabernan, Jon Maia eta Agin Rezolarekin. Umore onean aritu ziren bertsolariak eta aparteko giroa sortu zuten. 30 lagun inguru elkartu ziren.
Zapatuan, amaitzeko, haurrendako tailerrak egin zituzten Simon Arrieta plazan. Besteak beste, Euskaraz bizi nahi dut leloarekin txapak eta banderak egin zituzten. Gauean, eguna borobiltzeko, kontzertua izan zen gaztetxean.
Donostian jaialdia
Zapatu honetan, hilak 17, Euskaraz bizi eguna egingo da Donostian. Horrenbestez, motorrak berotzea eta jendea hiriburura joatera animatzea ere bazen aste hau antolatzearen helburua. Egun osoko egitaraua antolatu dute: tailerrak, manifestazioa eta kontzertuak, besteak beste.