Hunkidura aurpegiak Askaren senideen artean, txalo zaparrada frontoia bete zutenen artean eta Mikel Goñiren espektakulua eta pilotakada indartsuak ardatz izan ziren atzo Bergarako pilotalekuan, Mikel Askasibar presoaren alde antolatutako pilota jaialdian.
"Herriak erantzun du"
Ekimenaren helburua mezu bikoitza helaraztea zen: Askaren askatasuna exijitzea eta haren senideei elkartasuna adieraztea, eta ondo asko lortu zuten, frontoian batu zen jendetza ikusita. Antolatzaileak pozik emaitzarekin "herriak erantzun duela" ikusita, eta horrek "aurrera segitzeko kemena" ematen duela aitortu zuten, "ea hurrengoan ere halako erantzun zabala edo handiagoa lortzen dugun", kontatu zuen Xabier Lazkanok, aske geratu den Bergarako azkeneko presoak.
Mikel Goñiren ekarpena
Jaialdiak, baina, beste protagonista batzuk ere izan zituen, jakina: pilota jaialdia izanda, pilotariak eurak, eta tartean Mikel Goñi. "Ni nahiko abertzalea naiz eta gustuko dut halakoetan laguntzea; gure ekarpen txikia eginez ahal baldin bada lagundu, egingo dugu", adierazi zuen.