Iaz Jon Rivero bergararra izan zen talde batean lehiatu zen ordezkari bakarra (Debabarrenan) –independiente moduan izan zen beste txirrindulariren bat edo beste–, eta 2010ean afizionatuetan jardundako Iban Caballerok, Xabier Arantzetak eta Asier Penabadek txirrindularitza utzi zuten. Aurten goitik behera irauli da egoera, domekan Debagoieneko bederatzi txirrindularik hasiko dutelako Soraluzen (09:40) denboraldia. Lasterketa ibarreko mugetatik kanpo hasi eta amaituko badute ere, adi, txirrindulariek gureko errepideetatik egingo dituztelako lasterketak izango dituen 118 kilometroetako asko; mendate bakarra ere gurean igoko dute, Asentzio.
Bi taldetan banatuta
Debagoieneko bederatzi txirrindulariak bi taldetan banatuta egongo dira. Bergara aldekoek (Rivero, Aristi, Lizarralde eta Orobengoa) Debabarrenan lider jarraituko duten Aitor Gonzalez eta Sergio Ruiz izango dituzte erreferente. Nobedade handia Kanpantzar Harrobiak Baiñu-Etxe taldearen sorrera izan da, eta talde horretan bost dira ibarrekoak. Etzi batuko dira denak, Soraluzen, irteera puntuan.
DEBAGOIENEKO ZIKLISTAK:
kanpanzar Harrobiak Baiñu-Etxe
Alex Aranburu. 19 urte
Rafa Cordero. 19 urte
Iker Eskibel. 19 urte
Aitor Umerez. 19 urte
Kepa Otxoa. 25 urte
Debabarrena
Jon Rivero. 20 urte
Eneko Lizarralde. 19 urte
Odei Orobengoa. 19 urte
Mikel Aristi. 19 urte
Zapatuan, gazteendako Soraluce Koop. Saria, Osintxun
Bihar, zapatua (16:00) Osintxun batuko dira gazte mailako txirrindulariak –110 inguru– denboraldiko lehen lasterketari aurre egiteko gertu. Parte-hartzaileen artean, talde gipuzkoarrez gain, Burgostik, Kantabriatik, Bizkaitik, Arabatik eta oro har, inguruko beste probintzietatik etorritako ziklistak izango dira. Gizonezkoekin batera aurreko ekitaldietan gertatu den bezala hainbat emakumezko ere espero dituzte irteera puntuan, eta horiendako ere sari bereziak izango dira, nahiz eta Soraluce enpresak babestuta aurrerago ere Osintxun egingo duten emakumezkoendako lasterketa.
Biharko lasterketarako antolatzaileek ibilbidearen azken kilometroetan erripa bat sartzea erabaki dutee. Ez da puntuagarria izango, baina seguru, bat baino gehiago ausartuko dela helmugatik hiru kilometrora dagoela kontutan hartuta. Soraluce S. Coop. enpresak babestutako lasterketa honek, 85 kilometro luze izango ditu Osintxu , Zubillaga eta Elgoibar artean. Beti bezala, antolatzaileek, parte hartzea bultzatzeko eta txirrindulariek lasterketa amaitzeko bidea izan dezaten, ibilbide laua prestatu dute, aipatutako azken hiru kilometrotako malda izan ezik; horrek baina, ez du inor lasterketatik kanpo utziko.