Bergarako odol emaileen elkartea eta Fernando Idigoras eskutik joan dira urtetan, 44 urtez hain zuzen ere. Herriko lehen emailea izan ez bazen ere, lehen txartela harena da, 1.505 zenbakiduna hain zuzen. Orain, erreleboaren ordua iritsi zaio: Antonio Herzogek beteko du Idigorasen lekua.
Lokalaren zain
Abuztuan Seminarioan azken odol ateratzea egin zutenetik, lokal berriaren zain jarraitzen dute herriko odol emaileek. Bien bitartean, anbulatorioan egiten dituzte odol ateratzeak; halere, bilerak eta bestelako gestioetarako lokala eskatu diote Udalari. Azken bilera Gabonen atarian egin zuten Idigorasek, Romerak eta Herzogek Udaleko zinegotzi Maren Belastegirekin. Oraindik ez dute udaletxean inolako erabakirik hartu horren gainean. Elkartearendako lokala lortzea izango da aurtengo erronka nagusietako bat.
Odol ateratzea bihar
Aurten ere hamabostean behin egingo dituzte odol ateratzeak anbulatorioan, 18:00etatik 20:30era; bihar, eguaztena, urteko bigarren hitzordua izango da. Urtarrilaren 11koan 32 odol ateratze egin zituzten. Antonio Herzogen hitzetan, "jaien eta zubien inguruan jende gutxiago dator, eta bestela 40 odol ateratzeen bueltan ibiltzen gara. Kopuru horri eustea da helburua hemendik urte amaierara. Seminarioko lokalean lortzen genituen zifren inguruan gabiltza. Edozelan ere, emaile berriak lortzeko kanpaina egingo dugu laster".
Bergarako odol emaileen elkartea 1966an jarri zuten abian Jose Mari Dulanto medikuak eta haren taldeak. Joseba Jauregi izan zen lehen arduraduna. Gipuzkoako elkarte sendoenetako da gaur, 900 odol emaile aktibo ingururekin.
Aurrerantzean hauek dituzue elkartearekin harremanetan jartzeko telefono berriak: Antonio Herzog: 669 10 89 77 edo 943 76 36 90. Eta Dulce Rodriguez: 628 07 97 72 edo 943 76 22 36.
